देखण चालो हे बने का चेहरा !
चेहरे में क्या जी बाँधऱ्या सेहरा !
सेहरे में क्या जी निशाना मेरा !!टेक!!
बनड़े की गेल ज्ञान की ढेरी !
ढेरी की गेल आत्मा मेरी !
मेरी की गेल करो मत देरी !
देरी में क्या जी,हर्ज सै तेरा !!1!!
सेहरे में क्या जी निशाना मेरा !!टेक!!
उस बनड़ी की गैल बन्ना प्यारा !
उस प्यारे की गैल संग म्हारा !
उस म्हारे की गैल सगा थारा !
उस थारे की गैल कुटुंब हो सारा !
सारे में क्या जी,मोह का घेरा !!2!!
सेहरे में क्या जी निशाना मेरा !!टेक!!
उस रघुवर की गैल बणु सिया !
सिया की गैल राम पिया !
पिया की गैल लाग्या जीया !
जीया की गैल डटै हिया !
इस डटणै में क्या जी ,आनन्द का डेरा !!3!!
सेहरे में क्या जी निशाना मेरा !!टेक!!
उस लखमी की गैल मांगेराम है !
राम जी की गैल घनश्याम है !
उस श्याम जी की गैल जाटीगाम है !
गाम जी की गैल सच्चा धाम है !
उस धाम में क्या जी,हो दूर अँधेरा !!4!!
सेहरे में क्या जी निशाना मेरा !!टेक!!
copyright 2012-2013(c)
All right reserved with www.panditmangeramsangi.com
